پا ک بھارت کرکٹ بورڈز کو سمجھنا ہوگا کہ کرکٹ پاکستان اور بھارت دونوں سے بڑی ہے، یونس خان کا بیان
قومی ٹیم کے سابق کپتان یونس خان نے کہا ہے کہ اگر ایشیاء کپ پاکستان میں ہوجائے تو کیا ہی بات ہے، بدقسمتی سے ایشیاء کپ کا انعقاد مسئلہ بنا ہوا ہے، پاکستان اور بھارت کو بات کر کے مسئلہ حل کرنا چاہیے، دونوں بورڈز کو یہ سمجھنا ہوگا کہ کرکٹ پاکستان اور بھارت سے بڑی ہے۔
ان کا کہنا تھا کہ میرا نام بھارت کے خلاف پرفارم کرکے بنا ہے، پاک بھارت کرکٹ ہوگی تو بزنس اور کھلاڑی دونوں آگے بڑھیں گے۔
عالمی کپ کی تیاری کیلئے ون ڈے سیریز کا ہونا اہم ہے، پاکستان کرکٹ بورڈ (پی سی بی) کو بڑے ایونٹ سے پہلے پلاننگ کرنی چاہیے۔انہوں نے کہا کہ فٹنس تب آتی ہے جب آپ گراؤنڈ میں جا کر کرکٹ کھیلتے ہیں، بڑے مقابلوں میں بطور ٹیم کھیلیں، تینوں شعبے اہم ہیں۔
یونس خان نے مزید کہا کہ مجھے یقین ہے پاکستان ورلڈکپ کے ٹاپ فور میں پہنچے گا، ہماری ٹیم میں اچھے کھلاڑی موجود ہیں، فاسٹ باؤلنگ بہت اچھی ہے، ٹیم میں 3، 4 کھلاڑی ایسے ہیں جو پاکستان کو جتوا سکتے ہیں، پاکستان ورلڈکپ جیتنے کی صلاحیت رکھتا ہے، فخر زمان اور بابر اعظم جیسے اچھے بلے باز موجود ہیں۔
یونس خان کا کہنا تھا کہ بابراعظم کو مشورہ ہے کہ بڑے میچ میں کپتان کے پاس 2، 3 پلان ہونے چاہیے، پاک بھارت میچ کا پریشر نہ لیں، انجوائے کریں۔
