تفصیلات کے مطابق پاکستان کرکٹ بورڈ کی عبوری سلیکشن کمیٹی کے سربراہ شاہد آفریدی کا کہنا ہےکہ پاکستان کو ٹاپ ٹیم بنانےکے لیے اچھی پچز ضروری ہیں،کھلاڑیوں کے دلوں سے خوف نکالنا چاہتے ہیں۔کراچی میں سلیکشن کمیٹی نے کپتان بابراعظم اور کوچ ثقلین مشتاق سے ملاقات کی جس میں سلیکشن کے امور پر تبادلہ خیال کیا گیا۔
سابق کپتان اور عبوری چیف سلیکٹر شاہد آفریدی کا کہنا تھا کہ ہیڈ کوچ اورکپتان کے ساتھ کافی اچھی میٹنگ رہی، تگڑی کرکٹ ، اچھی پچز اور مثبت حکمت عملی پر بھی بات کی گئی۔
ان کا کہنا تھا کہ پاکستان کرکٹ کی بہتری کے لیے مل کر کام کریں گے، باہر تگڑی کرکٹ کھیلنے کے لیے یہاں تیاری کرنا ہوگی، پچز بھی اچھی ہوں گی، کوئی بڑا فرق نہیں ہوگا۔
انہوں نے کہا کہ سلیکشن کے معاملے پر بھی کافی مثبت تبادلہ خیال ہوا ہے، سلیکشن کمیٹی اور منیجمنٹ تقریباً ایک پیچ پر ہی ہیں، سب کے ساتھ مشورہ کافی اہم چیز ہے۔
