تفصیلات کے مطابق قومی کرکٹ ٹیم کے کپتان بابر اعظم نے کہا ہے کہ راولپنڈی ٹیسٹ ہم جیتنے کے لیے کھیل رہے تھے، پاکستان میچ اپنے حق میں ختم نہیں کر پایا۔ کپتان بابر اعظم نے میڈیا سے گفتگو میں یہ بھی انکشاف کیا کہ راولپنڈی ٹیسٹ کی پچ میں میری رائے شامل تھی۔
انہوں نے یہ بھی کہا کہ جو ہم چاہ رہے تھے، ویسی پچ ہمیں نہیں ملی، ہم اسپنرز کے لیے سازگار پچ چاہتے تھے، جو نہیں مل پائی۔ قومی ٹیم کپتان نے مزید کہا کہ پاکستان راولپنڈی ٹیسٹ جیتنے کے لیے کھیل رہا تھا،
جب یکے بعد دیگرے وکٹیں گریں تو پاکستان میچ ہار گیا۔ ہمارے اسپنرز نے بھی اچھی بولنگ کی، شاہین شاہ آفریدی کی کمی راولپنڈی ٹیسٹ میں محسوس ہوئی۔
بابر اعظم نے یہ بھی کہا کہ حارث رؤف کی انجری سنجیدہ نوعیت کی ہے، معلوم نہیں وہ ملتان ٹیسٹ میں دستیاب ہوں گے یا نہیں۔ اس میچ میں بیٹنگ لائن نے اچھی کارکردگی دکھائی، شکست سے مایوسی ہوئی۔
