تفصیلات کے مطابق قومی ٹیم میں نام آنے کے انتظار میں تھک ہار کر تجربہ کار فرسٹ کلاس کرکٹر نے ریٹائرمنٹ کا اعلان کردیا۔ اچانک فیصلے سے ساتھی کھلاڑی بھی کافی حیران رہ گئے۔ فرسٹ کلاس کرکٹر نے آخری میچ اور اپنی آخری فرسٹ کلاس اننگز میں 182 شاندار رنز بھی بنائے۔
محمد سعد نے قذافی اسٹیڈیم میں قائداعظم ٹرافی کے میچ کے دوران ریٹائرمنٹ کا فیصلہ کیا۔ محمد سعد نے 123 فرسٹ کلاس میچز میں 33.62 کی اوسط سے 6389 رنز بنائے۔
محمد سعد کا کہنا تھا کہ انٹرنیشل کرکٹ میں موقع ملنے کی امید ختم ہونے کے خدشے پر ریٹائرمنٹ کا فیصلہ کیا۔ انہوں نے ساتھی کھلاڑیوں سے گفتگو کرتے ہوئے کہا کہ ’مجھے نہیں لگتا کہ اب مجھے موقع مل سکتا ہے، اس لیے اب کیا فائدہ۔‘
محمد سعد سے ساتھی کھلاڑیوں نے نیک خواہشات کا اظہار کیا جبکہ آخری اننگز کے بعد اپنی ٹیم کے علاوہ حریف ٹیم کے کھلاڑیوں نے بھی انہیں زبردست انداز میں خراج تحسین پیش کیا۔
