تفصیلات کے مطابق جنوبی افریقا کے جارحانہ بلے باز ڈیوڈ ملر کا کہنا تھا کہ ہمیں معلوم ہے پاکستانی کپتان بابر اعظم بڑا سکور نہیں کرپارہے اور ہم اس سے فائدہ اٹھانے کی کوشش کریں گے۔ سڈنی میں پریس کانفرنس کرتے ہوئے افریقی بیٹر نے کہا کہ جنوبی افریقی ٹیم مشکل صورتحال سے میچز جیتنا جانتی ہے،
ٹی ٹوئنٹی میں ہر صورتحال کے لیے تیار رہنا پڑتا ہے۔انہوں نے کہا کہ ہمارے پیس اٹیک نے گزشتہ چند ماہ میں زبردست کارکردگی کا مظاہرہ کیا ہے، ہم برصغر کے سپنرز کو کھیلنے کے لیے تیار ہیں،
ورلڈ کپ کا ہر میچ اہم ہے اور پاکستان ایک سخت ٹیم ہے۔پریس کانفرنس میں ڈیوڈ ملر کا کہنا تھا کہ پاکستان کے پاس اچھے میچ ونرز کھلاڑی ہیں، بابر اعظم اور رضوان کی وکٹیں جلد لے کر
مڈل آرڈر پر پریشر ڈالنے کی کوشش کریں گے۔ ملر نے کہا کہ معلوم ہے کہ بابراعظم بڑا سکور نہیں کرپارہے، اس چیز کا فائدہ اٹھانے کی کوشش کریں گے۔ جنوبی افریقی بیٹر نے یہ بھی کہا کہ پاکستان کے لیے ضروری ہے کہ
وہ یہ میچ جیتیں اور وہ اس کی پوری کوشش کریں گے۔ خیال رہے کہ اگر پاکستان اپنے بقیہ دونوں میچز جیت گیا تو قومی ٹیم کے سیمی فائنل میں پہنچنے کی اُمیدیں پھر بھی زندہ رہیں گی۔
